30 July, 2020 06:17:32 AM
പശ്ചിമ ബംഗാള് പിസിസി അധ്യക്ഷന് സോമന് മിത്ര അന്തരിച്ചു
കൊല്ക്കത്ത: മുതിര്ന്ന കോണ്ഗ്രസ് നേതാവും പശ്ചിമ ബംഗാള് പിസിസി അധ്യക്ഷനുമായിരുന്ന സോമന് മിത്ര അന്തരിച്ചു. 78 വയസ്സായിരുന്നു. വാര്ധക്യ സഹജമായ അസുഖങ്ങളെ തുടര്ന്നായിരുന്നു അന്ത്യം. വ്യാഴാഴ്ച പുലര്ച്ചെ കൊല്ക്കത്തിയിലെ ആശുപത്രിയില്വച്ചായിരുന്നു അന്ത്യം. വൃക്ക സംബന്ധമായ അസുഖത്തെ തുടര്ന്നു ഏതാനും ദിവസങ്ങളായി അദ്ദേഹം കൊല്ക്കത്തയിലെ ആശുപത്രിയില് ചികിത്സയിലായിരുന്നു.
മിത്രയുടെ കോവിഡ് പരിശോധനാ ഫലം നെഗറ്റീവാണെന്ന് അധികൃതര് പറഞ്ഞു. സോമന് മിത്ര ദീര്ഘകാലം എംഎല്എയും എംപിയുമായി സേവനമനുഷ്ഠിച്ചിട്ടുണ്ട്. 2008-ല് പ്രഗതിശീല് കോണ്ഗ്രസ് എന്ന പാര്ട്ടിയുണ്ടാക്കി കോണ്ഗ്രസ് വിട്ട ചരിത്രമുള്ളയാളാണ് അദ്ദേഹം. 2009-ല് തൃണമൂലില് ചേര്ന്ന് ഡയമണ്ട് ഹാര്ബര് എംപിയായി തെരഞ്ഞെടുക്കപ്പെട്ടിരുന്നു. 2014-ലാണ് സോമന് മിത്ര കോണ്ഗ്രസില് തിരിച്ചെത്തിയത്.