29 June, 2020 07:52:19 PM


ഒരു ലക്ഷത്തോളം രൂപയുടെ ബില്ലില്‍ ഷോക്കടിച്ച് നടി കാര്‍ത്തിക നായര്‍



മുംബൈ: വൈദ്യുതി ബില്ലിലൂടെ ഷോക്കടിപ്പിക്കുന്നത് കേരളത്തില്‍ മാത്രമല്ലെന്ന് തെളിയിച്ച് നടി കാര്‍ത്തികയ്ക്ക് ലഭിച്ച ബില്‍. തനിക്ക് ലഭിച്ച ബില്ലിലെ തുക കണ്ട് ഞെട്ടിയത് മലയാള നടി കാർത്തിക നായർ. ആയിരങ്ങൾ ബിൽ തുകയായി വന്നത് കണ്ട് പൊതുജനം അമ്പരന്നുവെങ്കിൽ ഒരു ലക്ഷത്തോളം രൂപയാണ് കാർത്തികയ്ക്ക് വന്ന വൈദ്യുതി ബിൽ. ബിൽതുക കണ്ട പാടെ തനിക്കുണ്ടായ ഞെട്ടൽ കാർത്തിക ഒരു ട്വീറ്റിൽ പ്രകടിപ്പിച്ചു. 


സിനിമയിൽ നിന്നും ബിസിനെസ്സിലേക്ക് തിരിഞ്ഞ കാർത്തിക ഇപ്പോൾ പ്രമുഖ ഹോട്ടൽ വ്യവസായ ഗ്രൂപ്പിന്റെ ഡയറക്ടറാണ്. മുംബൈയിലെ വീട്ടിലേക്ക് അദാനി ഇലെക്ട്രിസിറ്റി മുംബൈയുടെ ബില്ലിലാണ് ഭീമമായ തുക ഉണ്ടായിരുന്നത്. ഹോട്ടൽ ബില്ലിൽ അല്ല, സ്വന്തം വീട്ടിലേക്കാണ് ഇത് വന്നതെന്നും പറഞ്ഞ കാർത്തിക തന്റെ അമ്പരപ്പ് മറച്ചുപിടിച്ചില്ല. മീറ്റർ റീഡിങ് എടുക്കാതെയാണ് ബിൽ നൽകിയതെന്ന് കാർത്തിക പരാതിപ്പെടുന്നു. കാർത്തികയുടെ ട്വീറ്റിന് അദാനി ഇലെക്ട്രിസിറ്റി മറുപടി നൽകുന്നുണ്ട്. 


അക്കൗണ്ട് നമ്പറും കോൺടാക്ട് വിവരങ്ങളും തങ്ങൾക്ക് കൈമാറാൻ ഇവർ നിർദ്ദേശിക്കുന്ന റിപ്ലൈ ട്വീറ്റിൽ പറയുന്നു. ഇത്രയും തുക വന്നത് പരിശോധിക്കാമെന്നുള്ള ഉറപ്പുമുണ്ട്. മുൻകാല നടി രാധയുടെ മകളായ കാർത്തിക മലയാളത്തിൽ ലെനിൻ രാജേന്ദ്രൻ സംവിധാനം ചെയ്ത മകരമഞ്ഞിലൂടെയാണ് അരങ്ങേറ്റം കുറിച്ചത്. സംവിധായകൻ സന്തോഷ് ശിവനായിരുന്നു ഇതിലെ നായകൻ. ശേഷം 'കമ്മത്ത് ആൻഡ് കമ്മത്ത്' സിനിമയിലും നായികാ വേഷം ചെയ്തു. തമിഴ്, തെലുങ്ക് സിനിമകളിൽ സജീവമായിരുന്നപ്പോഴാണ് കാർത്തിക വ്യവസായ രംഗത്തേക്ക് തിരിഞ്ഞത്.



Share this News Now:
  • Mail
  • Whatsapp whatsapp
Like(s): 5.7K