22 June, 2020 08:09:25 PM


സിസ്റ്റർ ലിനിയുടെ ഭർത്താവിന്റെ ജോലി സ്ഥലത്തേക്ക് മാർച്ച്; 3 കോൺഗ്രസ് പ്രവർത്തകർ അറസ്റ്റിൽ



കോഴിക്കോട്: സിസ്റ്റർ ലിനിയുടെ ഭർത്താവ് സജീഷ് ജോലി ചെയ്യുന്ന ആരോഗ്യകേന്ദ്രത്തിലേക്ക് മാർച്ച് നടത്തിയ സംഭവത്തില്‍ മൂന്ന് കോണ്‍ഗ്രസ് പ്രവര്‍ത്തകര്‍ അറസ്റ്റിൽ. സിദ്ദിഖ് വളയംപറമ്പില്‍ , റാഷിദ് കിഴക്കോത്ത് , പേരാമ്പ്ര കുന്നുമ്മല്‍ സൂരജ് എന്നിവരെയാണ് പെരുവണ്ണാമൂഴി പൊലീസ് അറസ്റ്റ് ചെയ്തത്. കൂത്താളി പ്രാഥമികാരോ​ഗ്യകേന്ദ്രത്തിലേക്ക് മാ‍ർച്ച് നടത്തുകയും ആരോ​ഗ്യകേന്ദ്രം ജൂനിയര്‍ ഹെൽത്ത് ഇൻസ്പെക്ടറെ കൈയ്യേറ്റം ചെയ്യുകയും ചെയ്തതിന് കോൺ​ഗ്രസ് നേതാക്കൾക്കെതിരെ പൊലീസ് കേസെടുത്തിരുന്നു. ഡി സി സി സെക്രട്ടറി മുനീർ എരവത്ത് ഉള്‍പ്പെടെ 13 പേര്‍ക്കെതിരെയാണ് കേസ്. കൂത്താളി പി എച്ച് സി മെഡിക്കൽ ഓഫീസർ നൽകിയ പരാതിയിലാണ് നടപടി.



ആരോ​ഗ്യമന്ത്രി കെകെ ശൈലജയെ കോവിഡ് റാണിയെന്നും നിപ രാജകുമാരിയെന്നും വിശേഷിപ്പിച്ച കെപിസിസി അധ്യക്ഷൻ മുല്ലപ്പള്ളി രാമചന്ദ്രന്‍റെ പ്രസ്താവനയ്ക്കെതിരെ സജീഷ് രം​ഗത്തെത്തിയിരുന്നു. നിപ്പ കാലത്ത് ഗസ്റ്റ് റോളില്‍ പോലും മുല്ലപ്പള്ളി ഇല്ലായിരുന്നെന്നും തന്നെ ഫോണില്‍ വിളിച്ചില്ലെന്നും സജീഷ് ആരോപിച്ചിരുന്നു. ഇതിന് പിന്നാലെയാണ് സജീഷ് ജോലി ചെയ്യുന്ന ആരോഗ്യകേന്ദ്രത്തിലേക്ക് യൂത്ത് കോൺ​ഗ്രസ് മാ‍ർച്ച് നടത്തിയത്. മുഖ്യമന്ത്രി പിണറായി വിജയനും  ആരോഗ്യകേന്ദ്രത്തിലേക്ക് നടത്തിയ മാര്‍ച്ചിനെ വിമര്‍ശിച്ചിരുന്നു.​



Share this News Now:
  • Google+
Like(s): 2.6K