10 December, 2019 05:29:33 PM
സുപ്രീംകോടതിയിലെ ആദ്യ മലയാളി അഭിഭാഷക ലിലി തോമസ് അന്തരിച്ചു
ദില്ലി: സുപ്രീംകോടതിയിലെ മുതിര്‍ന്ന മലയാളി അഭിഭാഷക ലിലി തോമസ് (91) അന്തരിച്ചു. ഡല്‍ഹിയിലായിരുന്നു അന്ത്യം. സുപ്രീംകോടതിയിലെ ആദ്യ മലയാളി അഭിഭാഷകയാണ്. 1955ല്‍ മദ്രാസ് ഹൈക്കോടതിയിലായിരുന്നു ലിലി തോമസ് അഭിഭാഷക ജീവിതത്തിനു തുടക്കം കുറിച്ചത്. 1959-ല്‍ എല്‍എല്‍എം പൂര്‍ത്തിയാക്കിയതോടെ നിയമത്തില്‍ ബിരുദാനന്തരബിരുദം നേടിയ ആദ്യ ഇന്ത്യന്‍ വനിതയായി. 1960-ല്‍ സുപ്രീം കോടതിയില്‍ പ്രാക്ടീസ് തുടങ്ങി. നിരവധി പ്രധാനപ്പെട്ട പൊതുതാല്‍പ്പര്യ ഹര്‍ജികള്‍ സുപ്രീം കോടതിയില്‍ ഫയല്‍ ചെയ്തിട്ടുണ്ട്. ക്രിമിനല്‍ കേസുകളില്‍ ശിക്ഷിക്കപ്പെട്ട ജനപ്രതിനിധികളെ തെരഞ്ഞെടുപ്പില്‍ വിലക്കണമെന്ന് സുപ്രീം കോടതി വിധിച്ചത് ലിലി തോമസ് നല്‍കിയ ഹര്‍ജിയിലാണ്. ചങ്ങനാശേരി കുത്തുകല്ലുങ്കല്‍ പരേതരായ അഡ്വ.കെ.ടി. തോമസിന്‍റെയും അന്നമ്മയുടെയും മകളാണ്. അവിവാഹിതയാണ്.
