08 September, 2019 12:57:18 PM
പാലാ ഉപതെരഞ്ഞെടുപ്പിൽ ഒന്നിച്ചുള്ള പ്രചാരണമില്ല; സമാന്തര പ്രചാരണം പരിഗണനയിലെന്നും ജോസഫ്
പാലാ: ഉപതെരഞ്ഞെടുപ്പിൽ യുഡിഎഫ് സ്ഥാനാർഥിക്കായി ഒന്നിച്ചുള്ള പ്രചാരണത്തിനുള്ള സാഹചര്യമില്ലെന്നു കേരള കോണ്ഗ്രസ് നേതാവ് പി.ജെ. ജോസഫ്. വിഷയത്തിൽ കോണ്ഗ്രസ് നേതാക്കൾ ഇടപെട്ടിട്ടുണ്ട്. സമാന്തര പ്രചാരണ വിഷയത്തിൽ ചർച്ച നടത്തും. ചർച്ചയ്ക്കായി മോൻസ് ജോസഫ്, ജോയ് എബ്രഹാം എന്നിവരെ ചുമതലപ്പെടുത്തിയെന്നും ജോസഫ് പറഞ്ഞു.
പാലാ ഉപതെരഞ്ഞെടുപ്പിൽ ജോസ് ടോമിനുവേണ്ടി യുഡിഎഫിനൊപ്പം പ്രചാരണത്തിനില്ലെന്നും കേരള കോണ്ഗ്രസ് ജോസഫ് ഗ്രൂപ്പ് തനിച്ചു പ്രചാരണം നടത്തുമെന്നും പി.ജെ. ജോസഫ് വിഭാഗം ജില്ലാ പ്രസിഡന്റ് സജി മഞ്ഞക്കടന്പിൽ കഴിഞ്ഞ ദിവസം പറഞ്ഞിരുന്നു. പാലായിൽ നടന്ന യുഡിഎഫ് കണ്വൻഷനിൽ പി.ജെ.ജോസഫിനെതിരേ പ്രതിഷേധമുയരുകയും പ്രതിച്ഛായ മാസികയിൽ വിമർശനം വരികയും ചെയ്ത സാഹചര്യത്തിലാണ് ഈ നീക്കം.
അതേസമയം, ഐക്യജനാധിപത്യ മുന്നണിയുടെ മുഴുവൻ നേതാക്കളും പ്രവർത്തകരും യുഡിഎഫ് സ്ഥാനാർഥി ജോസ് ടോമിന്റെ വിജയത്തിനായി ഒറ്റക്കെട്ടായി പ്രവർത്തിക്കുകയാണെന്നും ഇതിനിടയിൽ വിവാദങ്ങളോടു പ്രതികരിക്കാനില്ലെന്നുമാണ് ജോസ് കെ. മാണി എംപിയുടെ പ്രതികരണം.