07 April, 2019 11:33:37 AM
സുരേഷ്ഗോപിയുടേത് ചട്ടലംഘനം; ജില്ലാ കളക്ടറെ ചട്ടം പഠിപ്പിക്കേണ്ട - മുഖ്യതെരഞ്ഞെടുപ്പ് ഓഫീസര് ടിക്കാറാം മീണ
തിരുവനന്തപുരം: തൃശൂരില് അയ്യപ്പന്റെ പേരില് വോട്ട് അഭ്യര്ഥിച്ച എന്ഡിഎ സ്ഥാനാര്ഥി സുരേഷ് ഗോപിയുടേത് ചട്ടലംഘനമാണെന്ന് മുഖ്യതെരഞ്ഞെടുപ്പ് ഓഫീസര് ടിക്കാറാം മീണ. ഇത് വ്യക്തമായി ബോധ്യപ്പെട്ടതിനാലാണ് കളക്ടര് ടി.വി.അനുപമ സ്ഥാനാര്ഥിക്ക് നോട്ടീസ് അയച്ചതെന്നും കളക്ടറെ ആരും തെരഞ്ഞെടുപ്പ് ചട്ടം പഠിപ്പിക്കേണ്ടെന്നും മീണ പറഞ്ഞു.
വരണാധികാരികൂടിയായ കളക്ടര്ക്കെതിരെ ബിജെപി നടത്തിയ വിമര്ശനങ്ങള് ശരിയല്ലെന്നും ടിക്കാറാം മീണ കൂട്ടിച്ചേര്ത്തു. നേരത്തെ, കളക്ടറുടെ നടപടിയെ വിമര്ശിച്ച് ബിജെപി നേതാക്കള് രംഗത്തെത്തിയിരുന്നു. കളക്ടറുടെ നടപടി വിവരക്കേടാണെന്നുവരെ ബിജെപി നേതാക്കള് പറഞ്ഞിരുന്നു. താന് ചട്ടം ലംഘിച്ചിട്ടില്ലെന്നായിരുന്നു സുരേഷ്ഗോപിയുടെ വാദം. ഇഷ്ട ദൈവത്തിന്റെ പേര് പറയാനാകാത്തത് എന്ത് ജനാധിപത്യമാണെന്നും അദ്ദേഹം ചോദിച്ചിരുന്നു.
വെള്ളിയാഴ്ച തേക്കിന്കാട് മൈതാനത്തു നടന്ന എന്ഡിഎയുടെ കണ്വന്ഷനിലായിരുന്നു സുരേഷ് ഗോപിയുടെ വിവാദ പ്രസംഗം. ശബരിമലയുടെ പശ്ചാത്തലത്തിലാണ് താന് വോട്ടിനുവേണ്ടി അപേക്ഷിക്കുന്നത്. ശബരിമല വിഷയം അയ്യപ്പഭക്തര് കേരളത്തില് മാത്രമല്ല ഭാരതത്തില് മുഴുവന് അലയടിപ്പിച്ചിരിക്കും. പ്രചാരണ വേളകളില് ശബരിമല ചര്ച്ചയാക്കില്ലെന്നു താന് പ്രതിജ്ഞ ചെയ്യുന്നു തുടങ്ങിയവയായിരുന്നു പ്രസംഗത്തിലെ പ്രസക്തഭാഗങ്ങള്. പ്രസംഗത്തിലെ വിവാദഭാഗം നോട്ടീസില് പരാമര്ശിച്ചിട്ടുണ്ട്.
മാതൃകാ പെരുമാറ്റച്ചട്ടമനുസരിച്ച് ജാതിയുടെയും സാമുദായിക വികാരങ്ങളുടെയും പേരില് വോട്ടുചോദിക്കാന് പാടില്ല. മുഖ്യ തെരഞ്ഞെടുപ്പ് ഓഫീസര് പുറപ്പെടുവിച്ച നിര്ദേശങ്ങളില് ശബരിമല തെരഞ്ഞെടുപ്പു വിഷയമാക്കരുതെന്ന് പരാമര്ശിച്ചിരുന്നു. ഈ നിര്ദേശങ്ങള്ക്കു വിരുദ്ധമാണ് സുരേഷ് ഗോപിയുടെ വാക്കുകള് എന്നു കാണുന്നതായി കളക്ടര് നോട്ടീസില് പറയുന്നുണ്ട്.