15 December, 2016 10:22:30 AM
മറ്റ് കമ്പനികളുടെ ഉൽപന്നങ്ങൾ സ്വന്തം ലേബലിൽ : പതഞ്ജലിക്ക് 11 ലക്ഷം രൂപ പിഴ
ഹരിദ്വാർ: ഉപഭോക്താക്കളെ തെറ്റിദ്ധരിപ്പിക്കുന്ന തരത്തിലുള്ള പരസ്യങ്ങൾ പ്രദർശിപ്പിച്ചതിന് യോഗ ഗുരു രാംദേവിന്‍റെ പതഞ്ജലി ആയുർവേദ ഗ്രൂപ്പിന് 11 ലക്ഷം രൂപ പിഴ. ഹരിദ്വാർ അഡീഷണൽ ഡിസ്ട്രിക്ട് മജിസ്ട്രേറ്റ് ലളിത് നരേൻ മിസ്രയാണ് പിഴ വിധിച്ചത്.
മറ്റ് കമ്പനികൾ നിർമ്മിച്ച ഉൽപന്നങ്ങൾ സ്വന്തം ലേബലിൽ വിറ്റതും അതിന്‍റെ പരസ്യം നൽകിയതുമാണ് പിഴ ശിക്ഷക്ക് കാരണമായത്. ഭക്ഷ്യ സുരക്ഷ നിയമത്തിലെ 52, 53 വകുപ്പുകളും പാക്കേജിംഗ് ആൻഡ് ലേബലിംഗ് ആക്ടിലെ വകുപ്പുകൾ പ്രകാരവുമാണ് പിഴ ശിക്ഷ വിധിച്ചിരിക്കുന്നത്. ഒരു മാസത്തിനകം പിഴയടക്കാൻ പതഞ്ജലി ഗ്രൂപ്പിനോട് കോടതി നിർദേശിച്ചു.
ഉൽപന്നങ്ങളുടെ ഗുണനിലവാരവുമായി ബന്ധപ്പെട്ട് പതഞ്ജലിക്കെതിരെ മറ്റൊരു കേസും നിലവിലുണ്ട്. 2012ലാണ് ആ കേസ് രജിസ്റ്റർ ചെയ്തത്. കേസിന്‍റെ വാദം ഇപ്പോഴും കോടതിയിൽ നടന്നുകൊണ്ടിരിക്കുകയാണ്. കമ്പനിയുടെ വരുമാനം 5000 കോടിയിൽ നിന്ന് 10000 കോടിയിലേക്ക് വർധിപ്പിക്കാനുള്ള കമ്പനിയുടെ ശ്രമത്തിനിടെയാണ് കോടതിയിൽ നിന്ന് പ്രതികൂല വിധിയുണ്ടായിരിക്കുന്നത്.
