30 July, 2022 06:43:46 PM


വിവിധ ജില്ലകളിലായി നൂറോളം കേസുകളിൽ പ്രതിയായ കുപ്രസിദ്ധ മോഷ്ടാവ് അറസ്റ്റില്‍



പാലാ: വിവിധ ജില്ലകളിലായി നൂറോളം കേസുകളിൽ പ്രതിയായ കുപ്രസിദ്ധ മോഷ്ടാവ് അറസ്റ്റില്‍. മലപ്പുറം ചോക്കാട് കുന്നുമ്മേൽ വീട്ടിൽ ചെല്ലപ്പന്‍റെ മകൻ പനച്ചിപ്പാറ സുരേഷ് എന്ന സുരേഷ് (62) നെയാണ് രാമപുരം പോലീസ് അറസ്റ്റ് ചെയ്തത്. കഴിഞ്ഞ ദിവസം പാറത്തോടുള്ള  ഫ്രാൻസിസ് ചെറുകര എന്നയാളുടെ വീട് കുത്തിത്തുറന്ന് ഇയാള്‍ മോഷണം നടത്തിയിരുന്നു. മോഷണത്തിനു ശേഷം ഇയാൾ ഒളിവിൽ പോവുകയായിരുന്നു. 

ജില്ലാ പോലീസ് മേധാവിയുടെ നേതൃത്വത്തിൽ പ്രത്യേക അന്വേഷണ സംഘം രൂപീകരിക്കുകയും ഇയാൾക്ക് വേണ്ടിയുള്ള തിരച്ചിൽ ശക്തമാക്കുകയും ചെയ്തിരുന്നു. കൂത്താട്ടുകുളത്ത് സമാനമായ കേസിൽ പ്രതിയായി ശിക്ഷ അനുഭവിച്ച് പുറത്തിറങ്ങിയതിനു ശേഷമാണ് കഴിഞ്ഞദിവസം രാത്രി ഇയാൾ വീട് കുത്തിത്തുറന്ന് മോഷണം നടത്തിയത്. ഇയാൾക്ക് മലപ്പുറം, എറണാകുളം, കൂത്താട്ടുകുളം, മൂവാറ്റുപുഴ, ഈരാറ്റുപേട്ട, മണർകാട്, പള്ളിക്കത്തോട്, തിടനാട്, പാലാ എന്നീ  സ്റ്റേഷനുകളിലായി നൂറോളം കേസുകളാണ് നിലവിലുള്ളത്. 

അന്വേഷണസംഘം ഇയാളെ മലപ്പുറത്ത് നിന്നുമാണ് പിടികൂടിയത്. പാലാ ഡിവൈഎസ്പി ഗിരീഷ് പി സാരഥി, രാമപുരം എസ് എച്ച്. ഓ.  കെ. എൻ രാജേഷ്, എസ്. ഐ. മാരായ അരുൺകുമാർ പി. എസ്, സാബു എം.ജി, സി.പി.ഓ മാരായ കൃഷ്ണകുമാർ, റോബി തോമസ്, ശരത് കുമാർ പി.എസ്, നിതാന്ത് കൃഷ്ണൻ എന്നിവരും അന്വേഷണ സംഘത്തിൽ ഉണ്ടായിരുന്നു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.


Share this News Now:
  • Mail
  • Whatsapp whatsapp
Like(s): 6K