11 May, 2021 10:26:16 PM
കോവിഡ് ബാധിച്ച്‌ തൊഴുത്തില്‍ കഴിഞ്ഞിരുന്ന യുവാവ് മരിച്ചു; സംഭവം കിഴക്കമ്പലത്ത്
കൊച്ചി: കിഴക്കമ്പലത്ത് കോവിഡ് ബാധിച്ച്‌ തൊഴുത്തില്‍ കഴിഞ്ഞിരുന്ന യുവാവ് മരിച്ചു. കിഴക്കമ്പലം മലയിടം തുരുത്ത് ഒന്നാം വാര്‍ഡില്‍ മാന്താട്ടില്‍ എം എന്‍ ശശി എന്ന സാബു (38) ആണ് മരിച്ചത്. ഇക്കഴിഞ്ഞ ഏപ്രില്‍ 27 നാണ് ശശിക്ക് പരിശോധനയിൽ കോവിഡ് ആണെന്ന് സ്ഥിരീകരിച്ചത്.
കുടുംബാംഗങ്ങള്‍ക്ക് രോഗം ബാധിക്കാതിരിക്കാനാണ് യുവാവ് വീടിനു അടുത്തുള്ള തൊഴുത്തില്‍ കഴിഞ്ഞിരുന്നത്. പ്രായമായ മാതാവും അവിവാഹിതനും രോഗിയുമായ സഹോദരനും രണ്ടര വയസ് മാത്രമുള്ള പിഞ്ചുകുഞ്ഞും ഭാര്യയും വീട്ടിലുള്ളതിനാല്‍ അവര്‍ക്ക് രോഗം ബാധിക്കുമെന്ന ആശങ്കയിലാണ് ശശി തൊഴുത്തിൽ കഴിഞ്ഞത്.
മെയ് ഒന്നിന് സഹകരണബാങ്കില്‍ നിന്ന് കോവിഡ് ബാധിതര്‍ക്കുള്ള കിറ്റുമായെത്തിയവർ ഇടപെട്ട് ശശിയെ ഫസ്റ്റ് ലൈന്‍ ട്രീറ്റ് മെന്റ് സെന്‍ററിലേക്ക് മാറ്റി. എന്നാൽ പിന്നീട് ന്യുമോണിയ ബാധിച്ചതോടെ ശശിയുടെ ആരോഗ്യനില വഷളായി. മേഖലയിലെ രാഷ്ട്രീയ സാമൂഹ്യ പ്രവര്‍ത്തകര്‍ ഇടപെട്ട് ഇദ്ദേഹത്തെ അമൃത ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. വാര്‍ഡുതല ജാഗ്രതാസമിതിയുടെ നേതൃത്വത്തില്‍ സംസ്‌കാരം നടത്തി. കാളിക്കുട്ടിയാണ് മാതാവ്. ഭാര്യ: സിജ. മകന്‍: സായൂജ്.
