09 February, 2021 03:44:47 PM
ബോളിവുഡ് നടനും സംവിധായകനുമായ രാജീവ് കപൂർ അന്തരിച്ചു
ദില്ലി: ബോളിവുഡ് നടൻ രാജീവ് കപൂർ(58) അന്തരിച്ചു. ഹൃദയാഘാതത്തെ തുടര്ന്നായിരുന്നു അന്ത്യം. നടനെ കൂടാതെ സംവിധായകൻ, നിർമാതാവ് എന്നീ നിലകളിലും രാജീവ് കപൂർ തിളങ്ങിയിരുന്നു. ബോളിവുഡിലെ പ്രമുഖ നടനും സംവിധായകനുമായ രാജ് കപൂറിന്റെയും കൃഷ്ണ രാജ് കപൂറിന്റെയും മകനാണ്. ഋഷി കപൂറിന്റെയും രൺദീർ കപൂറിന്റെയും സഹോദരൻ കൂടിയാണ്. ബോളിവുഡ് താരങ്ങളായ കരീഷ്മ കപൂർ, കരീന കപൂർ, റണ്ബീര് കപൂര് തുടങ്ങിയവര് ബന്ധുക്കളാണ്.
1983-ല് പുറത്തിറങ്ങിയ ഏക് ജാന് ഹേന് ഹും എന്ന ചിത്രത്തിലൂടെയാണ് രാജീവ് കപൂർ സിനിമയിൽ അരങ്ങേറിയത്. ആസ്മാന്, ലൗ ബോയ്, സബര്ദസ്ത്, ഹം തോ ചലേ പര്ദേശ് തുടങ്ങിയവയാണ് പ്രധാന ചിത്രങ്ങൾ. 1996 ല് പുറത്തിറങ്ങിയ പ്രേംഗ്രന്ഥ് എന്ന ചിത്രം നിര്മിക്കുകയും സംവിധാനം ചെയ്യുകയും ചെയ്തു. 2001ൽ ഫാഷന് ഡിസൈനറും ആര്ക്കിടെക്ടുമായ ആരതി സബര്വാളിനെ വിവാഹം കഴിച്ചു. 2003ല് ഇവര് വേര്പിരിഞ്ഞു.