21 October, 2020 06:25:41 PM
രാഹുല്‍ ഗാന്ധി സിപിഎമ്മിന്‍റെ പുതിയ ന്യായീകരണ തൊഴിലാളി - എം.ടി. രമേഷ്
തിരുവനന്തപുരം : സിപിഎമ്മിന് പുതുതായി ലഭിച്ച ന്യായീകരണ തൊഴിലാളിയാണ് രാഹുല്‍ ഗാന്ധിയെന്ന് ബിജെപി സംസ്ഥാന ജനറല്‍ സെക്രട്ടറി എം.ടി. രമേഷ്. സ്വര്‍ണക്കള്ളക്കടത്തില്‍ രാഹുല്‍ ഗാന്ധിയുടെ പരാമര്‍ശത്തോട് കേരളത്തിലെ കോണ്‍ഗ്രസ് പാര്‍ട്ടി യോജിക്കുന്നുണ്ടോയെന്ന് ചെന്നിത്തല വ്യക്തമാക്കണമെന്നും എം.ടി. രമേഷ് ആവശ്യപ്പെട്ടു. മുഖ്യമന്ത്രിയുടെ പങ്കിനെ കുറിച്ച്‌ ആവര്‍ത്തിച്ചുള്ള ചോദ്യത്തിനും രാഹുല്‍ ഗാന്ധി ഒന്നും മിണ്ടിയില്ലെന്നും എം.ടി. രമേഷ് കുറ്റപ്പെടുത്തി.
ബിഹാറിലെ സഖ്യം കേരളത്തിലും ഉണ്ടാക്കാനുള്ള ശ്രമമാണിതെന്നും രമേശ് കുറ്റപ്പെടുത്തി. പുറത്തു വരുന്ന പ്രതികളുടെ മൊഴികളെ കുറിച്ച്‌ മുഖ്യമന്ത്രി പ്രതികരിക്കണമെന്നും എം.ടി. രമേഷ് പറഞ്ഞു. അതേസമയം ശോഭാ സുരേന്ദ്രന്‍ ബിജെപി പരിപാടികളില്‍ നിന്ന് എന്ത് കൊണ്ട് വിട്ടു നില്‍ക്കുന്നുവെന്ന ചോദ്യത്തിന് അവരുടെ പാര്‍ലമെന്‍റ് മണ്ഡലത്തിലെ പരിപാടികളില്‍ ശോഭാ സുരേന്ദ്രന്‍ സജീവമാണെന്നായിരുന്നു എം.ടി. രമേഷ് നല്‍കിയ മറുപടി.
