04 May, 2020 09:33:11 PM
കോട്ടയം സംക്രാന്തി സ്വദേശിനി യുവതി കുവൈറ്റില്‍ മരിച്ചു
കോട്ടയം : ജോലി തേടി കുവൈറ്റില്‍ എത്തിയ കോട്ടയം സ്വദേശിനി മരിച്ച നിലയില്‍. പാറമ്പുഴ സംക്രാന്തി മാമ്മൂട് തെക്കനായില്‍ സുമി (37) ആണ് കുവൈറ്റില്‍ മരിച്ചതായി ബന്ധുക്കള്‍ക്ക് വിവരം ലഭിച്ചത്. മെയ് രണ്ടിന് മരിച്ച നിലയില്‍ ഇവരെ കുവൈറ്റിലെ മുബാറക് ഹോസ്പിറ്റലില്‍ പ്രവേശിപ്പിക്കുകയായിരുന്നു. അതേസമയം ഹൃദയാഘാതമാണ് മരണ കാരണം എന്നാണ് മെഡിക്കല്‍ റിപ്പോര്‍ട്ട് എങ്കിലും പെട്ടെന്നുണ്ടായ മരണത്തില്‍ അസ്വാഭാവികതയും ആരോപിക്കപ്പെടുന്നുണ്ട്.
ആറ് മാസം മുന്‍പാണ് ഹോം നേഴ്‌സായി സുമി കുവൈറ്റിലെത്തിയത്. ഭര്‍ത്താവ് ഉപേക്ഷിച്ച സുമിക്ക് രണ്ട് മക്കളുണ്ട്. സാമ്പത്തികസ്ഥിതി പരിതാപകരമായതിനെ തുടര്‍ന്നാണ് വീട്ടുജോലിക്കായി കുവൈറ്റിലെത്തിയത്. എന്നാല്‍ ജോലി ലഭിക്കാതെ മാസങ്ങളായി ഇവര്‍ എംബസിയുടെ ഷെല്‍ട്ടറില്‍ കഴിയുകയായിരുന്നു എന്നാണ് വിവരം. എംബസിയില്‍ നിന്നാണ് സുമിയെ കഴിഞ്ഞ ദിവസം ആശുപത്രിയില്‍ എത്തിച്ചതെന്നാണ് അറിയുന്നത്. മൃതദേഹം നാട്ടിലെത്തിക്കാന്‍ ബന്ധുക്കള്‍ സഹായം തേടുകയാണ്.
