11 April, 2020 02:20:03 PM
പൊലിസ് മൊഴി മാറ്റിയെഴുതിയെന്ന്; വീട് ആക്രമിക്കപ്പെട്ട വിദ്യാര്‍ഥിനി നിരാഹാര സമരത്തിൽ
പത്തനംതിട്ട: പത്തനംതിട്ട തണ്ണിത്തോട്ടില്‍ വീടിനുള്ളിൽ കോവിഡ് നിരീക്ഷണത്തിലിരിക്കെ ആക്രമണത്തിനിരയായ വിദ്യാര്‍ഥിനി നിരാഹാര സമരത്തിൽ. ആക്രമണവുമായി ബന്ധപ്പെട്ട് അമ്മയുടെ മൊഴി മാറ്റിയ പോലീസുകാരനെതിരെയും പ്രതികള്‍ക്കെതിരെയും നപടി ആവശ്യപ്പെട്ടാണ് സമരം. സംഭവത്തില്‍ പ്രതികള്‍ക്കെതിരെ നിസാര വകുപ്പുകള്‍ ചുമത്തി പോലീസ് മൃദുസമീപനം തുടരുകയാണെന്ന് പെൺകുട്ടി ആരോപിക്കുന്നു.
പെണ്‍കുട്ടിയുടെ അമ്മയുടെ മൊഴി ഗൗരവമായി എടുക്കാതെ ചില മാറ്റങ്ങള്‍ വരുത്തിയാണ് രേഖപ്പെടുത്തിയതെന്നും പെണ്‍കുട്ടിയും കുടുംബവും ആരോപിക്കുന്നു. അതേസമയം അമ്മയുടെ മൊഴി വീണ്ടുമെടുക്കാന്‍ അടൂര്‍ ഡിവൈഎസ്പിയെ ചുമതലപ്പെടുത്തിയിട്ടുണ്ട്. സംഭവത്തില്‍ സിപിഎം പ്രവര്‍ത്തകരായ മൂന്ന് പേരെ നേരത്തെ അറസ്റ്റ് ചെയ്തിരുന്നു. മൂന്ന് പേര്‍ ഇന്ന് കീഴടങ്ങി.
കേസില്‍ ആറ് പ്രതികളെയാണ് പൊലീസ് പ്രതി ചേര്‍ത്തത്. ഇവര്‍ ആറ് പേരും സിപിഎം പ്രവര്‍ത്തകരാണ്. ഇത് സംഭവിക്കാന്‍ പാടില്ലാത്ത കാര്യമാണെന്നും ദൗര്‍ഭാഗ്യകരമാണെന്നും മുഖ്യമന്ത്രി സംഭവത്തോട് പ്രതികരിച്ചിരുന്നു. ഇതേ തുടര്‍ന്ന്‌ സംഭവത്തില്‍ ഉള്‍പ്പെട്ട ആറ് പ്രതികളെയും അന്വേഷണ വിധേയമായി പാര്‍ട്ടിയില്‍ നിന്ന് സസ്‌പെന്‍ഡ്‌ ചെയ്തിരുന്നു.
