19 September, 2019 08:02:53 PM
കോഴിക്കോട് രാത്രിയില്‍ റോഡ് മുറിച്ച് കടന്നയാള്‍ ബൈക്കുകള്‍ കയറിയിറങ്ങി മരിച്ചു
കോഴിക്കോട്: വെള്ളിപറമ്പില്‍ രാത്രിയില്‍ റോഡ് മുറിച്ച് കടന്നയാള്‍ ബൈക്കിടിച്ച് മരിച്ചു. ഇടിച്ചു വീഴ്ത്തിയ ബൈക്ക് നിര്‍ത്താതെ പോയി. പരിക്കേറ്റ് റോഡില്‍ കിടന്നയാളുടെ ശരീരത്തിലൂടെ മറ്റൊരു ബൈക്കും കയറിയിറങ്ങി. ഈ ബൈക്കും നിര്‍ത്താതെ പോയി. ചേവായൂര്‍ സ്വദേശി ഷാജിബാണ് മരിച്ചത്. കഴിഞ്ഞ രാത്രി ഒരു മണിയോടെയാണ് സംഭവം. ഇന്ന് രാവിലെയാണ് ഷാജിബ് മരിച്ചത്.
ബൈക്കിടിച്ച് റോഡില്‍ രക്തം വാര്‍ന്ന് കിടന്നയാളെ ആളുകള്‍ ഓടിക്കൂടി ഈ വഴി വന്ന ആംബുലന്‍സില്‍ കയറ്റി കോഴിക്കോട് മെഡിക്കല്‍ കോളജ് ആശുപത്രിയില്‍ എത്തിക്കുകയായിരുന്നു. ആദ്യം ബൈക്കിടിച്ചപ്പോള്‍ എഴുന്നേല്‍ക്കാന്‍ ശ്രമിക്കുന്നതിനിടെയാണ് രണ്ടാമത് ഷാജിബിന്‍റെ ശരീരത്തിലൂടെ ബൈക്ക് കയറിയിറങ്ങിയത്. രണ്ട് ബൈക്ക് യാത്രികരും നിര്‍ത്താതെ പോവുകയും ചെയ്തു. സംഭവത്തെ കുറിച്ച് പൊലീസ് അന്വേഷണം തുടങ്ങി.
