16 November, 2018 09:28:03 PM


സംഘര്‍ഷ സാധ്യത; കെ.പി.ശശികലയും ഭാര്‍ഗവറാമും പൃഥിപാലും കസ്റ്റഡിയില്‍; ശനിയാഴ്ച ഹർത്താൽ



പമ്പ: ശബരിമലയിലെ സംഘര്‍ഷ സാധ്യത കണക്കിലെടുത്ത് ഹിന്ദു ഐക്യവേദി അധ്യക്ഷ കെ.പി.ശശികല, സമര സമിതി നേതാവ് ഭാര്‍ഗവറാം എന്നിവരെ പൊലീസ് കസ്റ്റഡിയിലെടുത്തു. പോലീസ് നടപടിയിൽ പ്രതിഷേധിച്ച് ശബരിമല കർമ്മസമിതി ശനിയാഴ്ച രാവിലെ 6 മുതൽ വൈകിട്ട് 6 വരെ ഹർത്താലിന് ആഹ്വാനം ചെയ്തു. നേരത്തെ ആചാര സംരക്ഷണ സമിതി കണ്‍വീനര്‍ പൃഥിപാലിനെയും മറ്റൊരാളെയും കസ്റ്റഡിലെടുത്തിരുന്നു. കരുതല്‍ തടങ്കല്‍ എന്നാണ് പൊലീസിന്‍റെ വിശദീകരണം. നേരത്തെ ശബരിമല പരിസരത്ത് രണ്ട് തവണ സംഘര്‍ഷാവസ്ഥയുണ്ടായപ്പോഴും ഇവരുടെ സാന്നിധ്യമുണ്ടായിരുന്നെന്ന് പൊലീസ് പറയുന്നു.

ഇന്ന് ശബരിമല കയറാന്‍ വരുമ്പോള്‍ പമ്പ ഗാര്‍ഡ് റൂമിന് മുന്നില്‍ വച്ചാണ് ഇയാളെ കസ്റ്റഡിയിലെടുത്തത്. അക്രമം ഉണ്ടാക്കാന്‍ സാധ്യതയുള്ളവരെ കരുതല്‍ തടങ്കലിലാക്കാന്‍ പൊലീസ് തീരുമാനിച്ചിരുന്നു. ഇതിന്‍റെ ഭാഗമായാണ് നടപടി. ഇയാളെ ശബരിമല പരിസരത്ത് നിന്ന് മാറ്റിയിട്ടുണ്ട്. കഴിഞ്ഞ തവണ സംഘര്‍ഷമുണ്ടാക്കിയവരെ കര്‍ശനമായി തടയുമെന്ന് പൊലീസ് വ്യക്തമാക്കിയിട്ടുണ്ട്.

ഹർത്താൽ പ്രഖ്യാപിച്ച സാഹചര്യത്തിൽ കോട്ടയം റവന്യു ജില്ലാ സ്കൂൾ കലോത്സവത്തിന്റെ രണ്ടാം ദിനമായ ശനിയാഴ്ച നടക്കേണ്ട മത്സരങ്ങൾ മാറ്റിവെച്ചതായി അധികൃതർ അറിയിച്ചു.



Share this News Now:
  • Google+
Like(s): 158