19 October, 2018 10:54:16 AM


സ്ത്രീ പ്രവേശനം: പൂജകൾ നിർത്തിവെച്ച് പൂജാരിമാര്‍; നട അടച്ചിടേണ്ടിവരുമെന്ന് പന്തളം കൊട്ടാരം

.

Sabarimala women entry


ശബരിമല: സന്നിധാനത്ത് യുവതികള്‍ പ്രവേശിക്കുന്നത് തടയാന്‍ പൂജാരിമാരുടെ പ്രതിഷേധം. ശബരിമലയിലേയും മാളികപ്പുറത്തേയും മേല്‍ശാന്തിമാരുടെ പരികര്‍മ്മികളാണ് ശരണംവിളികളോടെ ശക്തമായ പ്രതിഷേധം ഉയര്‍ത്തുന്നത്. രാവിലെ 10 മണിയോടെയാണ് പ്രതിഷേധ സമരം തുടങ്ങിയത്. ശബരിമലയില്‍ ഇതുവരെ കണ്ടിട്ടില്ലാത്ത വിധമുള്ള പ്രതിഷേധമാണ് അരങ്ങേറുന്നത്.

ഇവര്‍ക്ക് പിന്തുണയുമായി ദേവസ്വം ബോര്‍ഡ് ജീവനക്കാരും അയ്യപ്പഭക്തരും എത്തിയിട്ടുണ്ട്. പ്രധാന പൂജകളില്‍ ഏര്‍പ്പെടുന്ന പരികര്‍മ്മികളാണ് പതിനെട്ടാംപടിക്ക് താഴെയിരുന്ന് ശരണം വിളിക്കുന്നത്. ഇതോടെ പൂജകള്‍ മുടങ്ങി. മേല്‍ശാന്തിമാര്‍ സമരത്തില്‍ പങ്കെടുക്കുന്നില്ല. അവര്‍ മഠങ്ങളില്‍ തന്നെയാണ്.

പ്രതിഷേധം നടക്കുന്നുണ്ടെങ്കിലും ഭക്തരെ തടയുന്നില്ല. ഭക്തരുടെ പ്രതിഷേധത്തെ തുടര്‍ന്ന് യുവതികള്‍ നടപ്പന്തലില്‍ കാത്തിരിക്കുകയാണ്. നടപ്പന്തലിന് മുന്നില്‍ കിടന്നാണ് ഭക്തര്‍ പ്രതിഷേധിക്കുന്നത്. വിശ്വാസികളെ വേണം കൊണ്ടുപേകാനെന്നും ആക്ടിവിസ്റ്റുകള്‍ക്കല്ല പോലീസ് സംരക്ഷണം നല്‍കേണ്ടതെന്നും ദേവസ്വംമന്ത്രി കടകംപള്ളി സുരേന്ദ്രന്‍ അറിയിച്ചു. യുവതികളെ തിരിച്ചിറക്കികൊണ്ടുപോകാനുള്ള ശ്രമത്തിലാണ് പോലീസ്. ഐ.ജിയുടെ നേതൃത്വത്തിലുള്ള സംഘം യുവതികളുമായി സമാധാന ചര്‍ച്ചകള്‍ നടക്കുകയാണ്.

അതേസമയം, ആചാരം ലംഘിച്ചാല്‍ നട അടച്ചിടേണ്ടിവരുമെന്ന് പന്തളം കൊട്ടാരം അറിയിച്ചു. രാവിലെതന്ത്രി കണ്ഠരര് രാജീവര് പന്തളം കൊട്ടാരവുമായി ചര്‍ച്ച നടത്തിയിരുന്നു.



Share this News Now:
  • Google+
Like(s): 205