11 October, 2018 03:37:11 PM


ശബരിമല: 16ന് തിരുവനന്തപുരത്ത് മുഖ്യമന്ത്രിയുടെ നേതൃത്വത്തില്‍ ജനകീയ കൂട്ടായ്മ

മുഖ്യമന്ത്രിയെ മുൻനിർത്തി വിമർശനങ്ങളെ പ്രതിരോധിക്കാൻ ഇടതുമുന്നണി



തിരുവനന്തപുരം: ശബരിമല സ്ത്രീപ്രവേശന വിഷയത്തില്‍ മുഖ്യമന്ത്രിയെ മുൻനിർത്തി വിമർശനങ്ങളെ പ്രതിരോധിക്കാൻ ഇടതുമുന്നണി യോഗം തീരുമാനിച്ചു. ഈ മാസം 16ന് തിരുവനന്തപുരത്ത് മുഖ്യമന്ത്രിയുടെ നേതൃത്വത്തില്‍ ബഹുജനകൂട്ടായ്മയും, 23ന് പത്തനംതിട്ടയിലും 24ന് കൊല്ലത്തും മുഖ്യമന്ത്രി പങ്കെടുക്കുന്ന വിശദീകരണ യോഗങ്ങളും നടത്തും.

കോടതി വിധിക്ക് പിന്നാലെ പൊതുജനങ്ങളെ തെറ്റിദ്ധരിപ്പിച്ച് ബിജെപി കുഴപ്പങ്ങളുണ്ടാക്കാന്‍ ശ്രമിക്കുകയാണെന്ന് എല്‍ഡ‍ിഎഫ് കണ്‍വീനര്‍ എ. വിജയരാഘവന്‍ പറഞ്ഞു. ഈ മാസം 30ന് മുമ്പ് എല്ലാ ജില്ലകളിലും വിശദീകരണ യോഗം ചേരും. കോൺഗ്രസ്സും ബിജെപിയും സാമുദായിക സംഘടനകളും സംസ്ഥാന സർക്കാറിനെതിരായ പ്രചാരണം ശക്തമാക്കുമ്പോഴാണ് ചെറുക്കാനുള്ള ഇടതുമുന്നണി തീരുമാനം.

വിധി നടപ്പാക്കേണ്ടതിന്‍റെ ആവശ്യകതയും എതിർക്കുന്ന പാർട്ടികളുടെ രാഷ്ട്രീയ ലക്ഷ്യങ്ങളും തുറന്ന് കാണിക്കാനാണ് ശ്രമം. കോണ്‍ഗ്രസ് ബിജെപിക്കൊപ്പം ചേര്‍ന്നത് അപകടകരം എന്ന് ഇടതുമുന്നണി കണ്‍വീനര്‍ എ. വിജയരാഘവൻ മാധ്യമങ്ങളോട് പറഞ്ഞു..അതേസമയം, ദേവസ്വം ബോർഡിന്‍റെ നിലപാട് മാറ്റത്തെ സ്വാഗതം ചെയ്ത പന്തളം രാജകുടുംബം ഒരു പാർട്ടിക്ക് കീഴിലും സമരത്തിനില്ലെന്നും വ്യക്തമാക്കി.



Share this News Now:
  • Google+
Like(s): 50