19 August, 2018 11:44:57 PM


മഴക്കെടുതി: വൈദ്യുത പ്രതിഷ്ഠാപനങ്ങള്‍ ഊര്‍ജ്ജീകരിക്കുമ്പോഴുള്ള മുന്‍കരുതലുകള്‍

വീട്ടിലേക്ക് കടക്കുന്നതിനു മുമ്പ് മെയിന്‍ സ്വിച്ച് ഓഫാണെന്ന് ഉറപ്പു വരുത്തണം




കോട്ടയം: മഴക്കെടുതിയെ തുടര്‍ന്ന് വൈദ്യുത പ്രതിഷ്ഠാപനങ്ങള്‍ ഊര്‍ജ്ജീകരിക്കുമ്പോള്‍ ശ്രദ്ധിക്കേണ്ട മുന്‍കരുതലുകള്‍ ഏറെയാണ്. ആദ്യം തന്നെ ഇത്തരം പ്രവ‍‍ത്തികള്‍ ചെയ്യുന്നതിലേക്കായി ലൈസന്‍സുള്ള ഇലക്ട്രിക്കല്‍ കോണ്‍ട്രാക്ടറുടെ സേവനം തേടാവുന്നതാണ്. സാങ്കേതിക ഉപദേശങ്ങള്‍ക്കും വിശദമായ പരിശോധന ആവശ്യമാണെന്ന് തോന്നുന്നുണ്ടെങ്കില്‍ ആയതിനും ഇലക്ട്രിക്കല്‍ ഇന്‍സ്‌പെക്ടറുടെ ഓഫീസുമായി ബന്ധപ്പെടണം (ഫോണ്‍: 0481 2568878). മുന്‍കരുതലുകള്‍ എന്തൊക്കെയെന്ന് ചുവടെ.

* ട്രാന്‍സ്‌ഫോര്‍മര്‍ 5 കെ വി  ഇന്‍സുലേഷന്‍ ടെസ്റ്റര്‍ ഉപയോഗിച്ച് അതിന്‍റെ ഇന്‍സുലേഷന്‍ പരിശോധിച്ച് സുരക്ഷിതമാണെന്ന് ഉറപ്പ് വരുത്തണം.

* ജനറേറ്ററില്‍ വെള്ളം കയറിയിട്ടുണ്ടെങ്കില്‍ അതിന്‍റെ ആള്‍ട്ടെര്‍നേറ്റര്‍ ഭാഗത്തിന്‍റെ ഇന്‍സുലേഷന്‍ വാല്യു 500 വോള്‍ട്ട് ഇന്‍സുലേഷന്‍ ടെസ്റ്റര്‍ ഉപയോഗിച്ച് പരിശോധിച്ച് സുരക്ഷിതമാണോ എന്ന് ഉറപ്പ് വരുത്തണം.  ജനറേറ്ററിന്‍റെ എന്‍ജിനില്‍ വെള്ളം കയറിയിട്ടുണ്ടെങ്കില്‍ എന്‍ജിന് കേടു പാടില്ല എന്ന് ഉറപ്പ് വരുത്തിയ ശേഷമേ പ്രവര്‍ത്തിപ്പിക്കുവാന്‍ പാടുള്ളു.

* വൈദ്യുത പാനലുകളില്‍ വെള്ളം കയറിയിട്ടുണ്ടെങ്കില്‍ ചെളിയോ നനവോ ഇല്ലാത്ത വിധം പാനലുകള്‍ വൃത്തിയാക്കി, ഇന്‍സുലേഷന്‍ റസിസ്റ്റന്‍സ് പരിശോധിച്ച് ഉറപ്പുവരുത്തണം.

* പാനലുകളിലെ എംസിബി, എംസിസിബി എന്നിവയില്‍ വെള്ളം കയറിയിട്ടുണ്ടെങ്കില്‍ പൂര്‍ണ്ണമായും സുരക്ഷിതമാണെന്ന് ഉറപ്പ് വരുത്താന്‍ പറ്റാത്ത പക്ഷം അവ മാറ്റി സ്ഥാപിക്കണം.

* കേബിളുകളില്‍ എവിടെയെങ്കിലും കേടുപാടുകളുണ്ടായിട്ടുണ്ടോ എന്ന് പരിശോധിച്ച് സുരക്ഷിതമാണെന്ന് ഉറപ്പു വരുത്തണം.

* എല്‍ ടി കേബിളുകള്‍ 500 വോള്‍ട്ട് ഇന്‍സുലേഷന്‍ ടെസ്റ്റര്‍ ഉപയോഗിച്ചും എച്ച് ടി കേബിളുകള്‍ 5000 വോള്‍ട്ട് ഇന്‍സുലേഷന്‍ ടെസ്റ്റര്‍ ഉപയോഗിച്ചും ഇന്‍സുലേഷന്‍ വാല്യു പരിശോധിച്ച് സുരക്ഷ ഉറപ്പുവരുത്തേണ്ടതാണ്.

* ചാര്‍ജ്ജ് ചെയ്യുന്നതിന് മുമ്പായി കൃത്യമായ റേറ്റിങ്ങിലുളള ഫ്യൂസ് തന്നെയാണ് നല്കിയിട്ടുള്ളതെന്ന് ഉറപ്പ് വരുത്തേണ്ടതാണ്.

* സ്ഥാപനത്തില്‍ താല്കാലിക വയറിംഗ് ഉണ്ടെങ്കില്‍ അവ വൈദ്യുതപരമായി പൂര്‍ണ്ണമായും വിച്ഛേദിച്ചതിന് ശേഷമേ പ്രതിഷ്ഠാപനം ഊര്‍ജ്ജീ കരിക്കുവാനുള്ള നടപടികളിലേക്ക് കടക്കാന്‍ പാടുള്ളു.

* സുരക്ഷാ പ്രവര്‍ത്തനത്തിന്‍റെ ഭാഗമായി ജെ.സിബി പോലുള്ള ഉപകരണങ്ങള്‍ പ്രവര്‍ത്തിപ്പിക്കുമ്പോഴോ മഴവെള്ളപ്പാച്ചിലിലോ എര്‍ത്തിംഗ് സംവിധാനത്തിന് കേടുപറ്റാന്‍ സാധ്യതയുണ്ട്. ആയതിനാല്‍ സ്ഥാപനങ്ങളിലേയും വീടുകളിലേയും എര്‍ത്ത് ഇലക്‌ട്രോഡിന്‍റെ സ്ഥിതി പരിശോധിച്ച് എര്‍ത്ത് കമ്പി അതിലേക്ക് കൃത്യമായി ഘടിപ്പിച്ചിട്ടുണ്ട് എന്ന് ഉറപ്പ് വരുത്തേണ്ടതാണ്.

*  എര്‍ത്ത് കമ്പിയില്‍ എവിടെയും പൊട്ടലുകള്‍ ഇല്ലായെന്ന് ഉറപ്പ് വരുത്തേണ്ടതാണ്.

* വീടുകളിലും സ്ഥാപനങ്ങളിലും വെള്ളം കയറിയിട്ടുണ്ടായിരുന്നെങ്കില്‍ നനവ് പൂര്‍ണ്ണമായും മാറിയതിന് ശേഷം വയറിങ്ങിന്‍റെ ഇന്‍സുലേഷന്‍ റസിസ്റ്റന്‍സ് പരിശോധിക്കേണ്ടതാണ്.

* വീട്ടിലേക്കുള്ള വൈദ്യുതി പ്രവാഹം ആദ്യം എത്തുന്നത് എനര്‍ജി മീറ്ററിലാണ് ഈ എനര്‍ജി മീറ്ററില്‍ സപ്ലൈ എത്തുമ്പോള്‍ എന്തെങ്കിലും അസ്വഭാവികത കണ്ടാല്‍ ഇലക്ട്രിസിറ്റി ഓഫീസിനെ അറിയിക്കണം.

* വീട്ടിലേക്ക് കടക്കുന്നതിനു മുന്‍പായി മെയിന്‍ സ്വിച്ച് ഓഫാണെന്ന് ഉറപ്പു വരുത്തണം.

* സബ് പാനല്‍/ഡി ബി എന്നിവ ഓഫ് ചെയ്തതിന് ശേഷമേ മെയിന്‍ സ്വിച്ച് ഓണ്‍ ചെയ്യാന്‍ പാടുള്ളു.

* ഇതിന് ശേഷം ഡി ബി-യിലെ ഇ എല്‍ സി ബി ഓണ്‍ ചെയ്ത് ടെസ്റ്റ് ബട്ടണ്‍ അമര്‍ത്തി അതിന്‍റെ പ്രവര്‍ത്തന ക്ഷമത ഉറപ്പ് വരുത്തേണ്ടതാണ്.

* ഇ എല്‍ സി ബി പ്രവര്‍ത്തന ക്ഷമമാണെങ്കില്‍ ഓരോരോ എം സി ബി-കളായി ഓണ്‍ ചെയ്യാവുന്നതാണ്.

* എം സി ബി/ഇ എല്‍ സി ബി-യോ ട്രിപ്പാകുകയാണെങ്കില്‍ ആ എം സി ബി ഓഫാക്കി വച്ച് ഇ എല്‍ സി ബി ഓണ്‍ ചെയ്യുക.  തുടര്‍ന്ന് ഓരോരോ എം സി ബി-കള്‍ ഓണ്‍ ചെയ്യുക.

* ഏതെങ്കിലും ഉപകരണം ഉപയോഗിക്കുമ്പോള്‍ എംസിബി/ഇ എല്‍ സി ബി ഓഫാകുകയാണെങ്കില്‍ ആ ഉപകരണം വീണ്ടും ഉപയോഗിക്കുന്നതിനു മുന്‍മ്പ് വിദഗ്ദരെക്കൊണ്ട് പരിശോധിപ്പിച്ചിരിക്കണം.



Share this News Now:
  • Google+
Like(s): 46