26 July, 2018 08:47:51 PM


നൂറ്റാണ്ടിലെ ഏറ്റവും വലിയ ചന്ദ്രഗ്രഹണം വെള്ളിയാഴ്ച രാത്രി

ചന്ദ്രഗ്രഹണം ഒരു മണിക്കൂറും നാൽപ്പത്തിമൂന്ന് മിനുട്ടും നീണ്ടു നിൽക്കും



തിരുവനന്തപുരം: നൂറ്റാണ്ടിലെ എറ്റവും വലിയ ചന്ദ്രഗ്രഹണത്തെ വരവേൽക്കാനൊരുങ്ങുകയാണ് ലോകം. പ്രതികൂല കാലവസ്ഥയല്ലെങ്കിൽ കേരളത്തിലും ഈ അപൂർവ്വ പ്രതിഭാസം കാണാനാകും. ഒരു മണിക്കൂറും നാൽപ്പത്തിമൂന്ന് മിനുട്ടും നീണ്ടു നിൽക്കുന്ന പൂർണ്ണ ചന്ദ്രഗ്രഹണം. വെള്ളിയാഴ്ച രാത്രി 10.42 ഓടെയായിരിക്കും ഇന്ത്യയിൽ ഗ്രഹണം കാണാനാവുക. ശനിയാഴ്ച പുലർച്ചെ അഞ്ചു മണിയോടെ ചന്ദ്രൻ പൂർണ്ണമായും ഭൂമിയുടെ നിഴലിൽ നിന്ന് പുറത്ത് വരും.

ഏഷ്യയിലും ആഫ്രിക്കയിലും പൂര്‍ണ ഗ്രഹണം ദൃശ്യമാകും. യൂറോപ്പിലും തെക്കേ അമേരിക്കയിലും ഓസ്ട്രേലിയയിലും ഗ്രഹണം ഭാഗീകമായിരിക്കും. സൂര്യനും ഭൂമിയും ചന്ദ്രനും നേർരേഖയിൽ വരുമ്പോഴാണ് ചന്ദ്രഗ്രഹണമുണ്ടാകുന്നത്, ഭൂമിയുടെ നിഴൽ ചന്ദ്രന്‍റെ മേൽ പതിയുന്നതാണ് ഗ്രഹണം. നിഴൽ വീണുണ്ടാകുന്ന മായാകാഴ്ച.

ഹാനികരമായ യാതൊരു വിധ രശ്മികളും ചന്ദ്രനിൽ നിന്ന് ഗ്രഹണ സമയത്ത് പ്രഭവിക്കില്ല. അതു കൊണ്ട് തന്നെ ഗ്രഹണം നേരിട്ട് കാണുന്നതിന് തടസ്സമില്ലത്രേ. നൂറ്റാണ്ടിലെ, പതിനേഴാമത്തെ പൂർണ്ണ ഗ്രഹണമാണിത്. രണ്ടായിരത്തി പതിനെട്ടിലെ രണ്ടാമത്തേതും, ജനുവരിയിലായിരുന്നു ആദ്യ ഗ്രഹണം, അന്നത്തേതു പോലെ നാളെയും ചന്ദ്രൻ ചുവന്ന നിറത്തിലാകുമെങ്കിലും അത്രയും വലിപ്പത്തിൽ നാളെ ചന്ദ്രനെ കാണാൻ കഴിയില്ല.



Share this News Now:
  • Google+
Like(s): 72