21 July, 2018 12:10:37 AM


വെള്ളം ഇറങ്ങി: ആറ് നാളത്തെ കാത്തിരിപ്പിന് വിരാമം; തങ്കമ്മയുടെ സംസ്കാരം ഇന്ന്

പേരൂര്‍ കാളകൂട്ടുങ്കല്‍ തങ്കമ്മയുടെ സംസ്കാരം ഇന്ന് രണ്ടിന് വീട്ടുവളപ്പില്‍




ഏറ്റുമാനൂര്‍: പ്രളയക്കെടുതിയില്‍ വീടിനുചുറ്റും വെള്ളം  നിറഞ്ഞതിനെ തുടര്‍ന്ന് മാറ്റിവെച്ച പേരൂര്‍ കാളകൂട്ടുങ്കല്‍ പരേതനായ രാമന്‍ നായരുടെ ഭാര്യ തങ്കമ്മ (93)യുടെ സംസ്കാരം ഇന്ന് നടക്കും. കഴിഞ്ഞ തിങ്കളാഴ്ചയാണ് തങ്കമ്മ അന്തരിച്ചത്. കനത്ത മഴയെതുടര്‍ന്ന് മീനച്ചിലാര്‍ കര കവിഞ്ഞൊഴുകിയപ്പോള്‍ തങ്കമ്മ താമസിക്കുന്ന വീടിനു ചുറ്റും വെള്ളമായി. ഇതോടെ സംസ്കാരം നടത്താനാവാതെ ബന്ധുക്കള്‍ ബുദ്ധിമുട്ടിലായി. ക്രമാതീതമായി ജലനിരപ്പ് ഉയരുന്നത് മൃതദേഹം വീട്ടില്‍ വെയ്ക്കാന്‍ പറ്റാത്ത അവസ്ഥയിലുമെത്തിച്ചു. വെള്ളമിറങ്ങുന്നതു വരെ മൃതദേഹം ആശുപത്രി മോര്‍ച്ചറിയില്‍ സൂക്ഷിക്കാന്‍ തീരുമാനിച്ചെങ്കിലും വെള്ളപൊക്കത്തില്‍ വാഹനങ്ങള്‍ വീട്ടിലേക്കെത്താത്ത അവസ്ഥ. അവസാനം മൃതദേഹം തെള്ളകത്തെ സ്വകാര്യ ആശുപത്രി മോര്‍ച്ചറിയില്‍ എത്തിച്ചത് നാട്ടുകാരുടെ സഹായത്തോടെ വള്ളത്തില്‍. വെള്ളം ഇറങ്ങാതെ കിടന്നതിനെ തുടര്‍ന്ന് സംസ്കാരവും അനന്തമായി നീളുകയായിരുന്നു. വെള്ളം പൂര്‍ണമായി ഇറങ്ങിയതിനെ തുടര്‍ന്നാണ് സംസ്കാരം ഇന്ന് ഉച്ചകഴിഞ്ഞ് രണ്ടിന് വീട്ടുവളപ്പില്‍ നടത്താന്‍ തീരുമാനിച്ചത്. മക്കള്‍: ഗോപി, രവീന്ദ്രന്‍ (ശ്രീകൃഷ്ണ പ്രസ്, പേരൂര്‍), ഇന്ദിര, മോഹനന്‍, സോമന്‍, അനില്‍, രാധ, ഉഷ, രാജു (ദുബായ്), മരുമക്കള്‍: ലീലാമണി, പൊന്നമ്മ, ചന്ദ്രശേഖരന്‍, ലത, അമ്മിണി, ഗീത, വിജയന്‍, രഘു,സുമ. 



Share this News Now:
  • Google+
Like(s): 342