19 June, 2018 03:51:58 PM
ലഫ്.ഗവർണർ പ്രതികരിച്ചു; കേജരിവാൾ സമരം അവസാനിപ്പിച്ചു
സെക്രട്ടറിയേറ്റ് ഉദ്യോഗസ്ഥരുമായി 'അടിയന്തിര' കൂടിക്കാഴ്ചക്ക് നിര്‍ദ്ദേശം
ദില്ലി: ദില്ലി മുഖ്യമന്ത്രി അരവിന്ദ് കേജരിവാൾ ലഫ്. ഗവർണർ അനിൽ ബൈജാലിന്‍റെ വസതിയിൽ നടത്തിവന്ന സമരം അവസാനിപ്പിച്ചു. ലഫ്. ഗവർണറുടെ ഔദ്യോഗിക വസതിയായ രാജ് നിവാസിൽ നടത്തിവന്ന കുത്തിയിരുപ്പ് സമരമാണ് അവസാനിപ്പിച്ചിരിക്കുന്നത്. സെക്രട്ടറിയേറ്റിലെ ഉദ്യോഗസ്ഥരുമായി 'അടിയന്തിര' കൂടിക്കാഴ്ച നടത്താൻ ലഫ്.ഗവർണർ കേജരിവാളിനു നിർദേശം നൽകിയതിനു പിന്നാലെയാണ് സമരം അവസാനിപ്പിച്ചത്.
നീണ്ട നിശബ്ദതയ്ക്കു ശേഷമാണ് ലഫ്.ഗവർണർ വിഷയത്തിൽ പ്രതികരിച്ചത്. ഈ മാസം പതിനൊന്നിനാണ് മുഖ്യമന്ത്രി അരവിന്ദ് കേജരിവാളും മൂന്നു മന്ത്രിമാരും ലഫ്.ഗവർണറുടെ ഒൗദ്യോഗിക വസതിയിൽ സമരം ആരംഭിച്ചത്. ദില്ലി മുഖ്യമന്ത്രി അരവിന്ദ് കേജരിവാൾ ചീഫ് സെക്രട്ടറി അംശു പ്രകാശിനെ ആം ആദ്മി പാർട്ടി നേതാക്കൾ മർദിച്ചതിൽ പ്രതിഷേധിച്ച് ചുമതലകളിൽനിന്നു വിട്ടുനിൽക്കുന്ന ഐഎഎസ് ഉദ്യോഗസ്ഥർക്കെതിരെ നടപടി ആവശ്യപ്പെട്ടായിരുന്നു സമരം.
