12 June, 2018 06:51:54 PM


വേതനകുടിശ്ശിഖ; ഏറ്റുമാനൂര്‍ നഗരസഭയില്‍ തൊഴിലുറപ്പ് പദ്ധതി നിശ്ചലമായി

കൂലിയിനത്തില്‍ കൊടുക്കാനുള്ളത് 25 ലക്ഷം രൂപ




ഏറ്റുമാനൂര്‍: അയ്യന്‍കാളി തൊഴിലുറപ്പ് പദ്ധതി പ്രകാരം ജോലിയെടുത്ത വനിതകള്‍ക്ക് കൂലി കൊടുക്കാനാവാതെ നഗരസഭ. ഏറ്റുമാനൂര്‍ നഗരസഭയില്‍ പദ്ധതി തുടങ്ങി ഇതുവരെ കൂലി കിട്ടാതായ തൊഴിലാളികള്‍ പണിക്കിറങ്ങാതായി. ഇതോടെ  നഗരസഭയിലെ വിവിധ വികസന പ്രവര്‍ത്തനങ്ങള്‍ അവതാളത്തിലായി. ഇരുപത്തഞ്ച് ലക്ഷം വേതനമിനത്തില്‍ ലഭിക്കാനുണ്ടെന്നാണ് തൊഴിലാളികള്‍ പറയുന്നത്. എന്നാല്‍ കൂലി തീര്‍ത്ത്‌ നല്‍കിയശേഷം പണിക്കിറങ്ങിയാല്‍ മതിയെന്ന നിലപാട് നഗരസഭ കൈകൊണ്ടിട്ടുണ്ടെങ്കിലും എന്ന് കൊടുക്കാനാവും എന്ന് അധികൃതര്‍ക്കും പറയാനാവുന്നില്ല.
 
അമ്പത് ലക്ഷം രൂപയുടെ പ്രോജക്ടാണ് അയ്യന്‍കാളി തൊഴിലുറപ്പ് പദ്ധതി പ്രകാരം ഏറ്റുമാനൂര്‍ നഗരസഭ സര്‍ക്കാരിന് സമര്‍പ്പിച്ചത്. ഇതിന് സര്‍ക്കാര്‍ അനുമതി ലഭിക്കുകയും ചെയ്തു.  കേന്ദ്രസര്‍ക്കാര്‍ വിഹിതം ഉള്‍പ്പെടുത്തിയാണ് പദ്ധതി പ്രാവര്‍ത്തികമാക്കേണ്ടത്. സര്‍ക്കാര്‍  വിഹിതം താമസിച്ചാല്‍ നഗരസഭയുടെ തനത് ഫണ്ടില്‍ നിന്നും തുക തത്ക്കാലം ചെലവിടാം. അതിനുള്ള തീരുമാനം രണ്ട് മാസം മുമ്പ് കൗണ്‍സില്‍ എടുക്കുകയും ചെയ്തിരുന്നു. എന്നാല്‍ മിനിറ്റ്സില്‍ കിണര്‍കുത്ത് തൊഴിലാളികള്‍ക്ക് തുക കൊടുക്കാന്‍ തീരുമാനിച്ചതായി എഴുതി ചേര്‍ത്തത് ഇതിന് തടസമായതായി കൗണ്‍സിലര്‍മാര്‍ ആരോപിക്കുന്നു.

നഗരസഭയിലെ തൊഴിലുറപ്പ് തൊഴിലാളികളില്‍ 1250 പേര്‍ക്കും തൊഴില്‍ കാര്‍ഡുള്ളരാണ്. ഒരു തൊഴിലാളിയുടെ കൂലി ദിവസം 258 രൂപയാണ്. കൃഷിവികസനം, തണ്ണീര്‍തടങ്ങളുടെ സംരക്ഷണം, നഗരസഭയുടെ അറിവോടെയുള്ള പൊതുജോലികള്‍, പിഎംഎവൈ ഭവനനിര്‍മ്മാണം എന്നീ മേഖലകളിലാണ് തൊഴിലുറപ്പ് പദ്ധതി പ്രകാരമുള്ള തൊഴിലാളികളുടെ സേവനം ലഭ്യമാകുന്നത്. പദ്ധതിയ്ക്ക് സര്‍ക്കാര്‍ അംഗീകാരം ലഭിച്ചതിനു ശേഷം ഇവര്‍ പണിയെടുത്തതിന്‍റെ ബില്‍ ഹാജരാക്കിയത് എല്‍എസ്ജിഡി അസിസ്റ്റന്‍റ് എഞ്ചിനീയറും നഗരസഭാ സെക്രട്ടറിയും പാസാക്കി. പക്ഷെ ഇന്നുവരെ തുക നല്‍കാന്‍ നഗരസഭയ്ക്കായില്ല. 

നഗരസഭയുടെ വരവും ചെലവും ഒരു തരത്തിലും പൊരുത്തപ്പെട്ടുപോകാത്ത അവസ്ഥയില്‍ തനതു ഫണ്ടില്‍ നിന്നും തുക നല്‍കുകയെന്നതും പ്രശ്നമായി നില്‍ക്കുകയാണ്. എന്നാല്‍ സ്കൂള്‍ തുറന്ന സമയത്ത് കുറച്ച് പണമെങ്കിലും തന്ന് തങ്ങളെ സഹായിക്കാന്‍ അധികൃതര്‍ തയ്യാറായില്ലെന്നും തൊഴിലാളികള്‍ പരാതിപ്പെടുന്നു.  നഗരസഭയിലെ പാവപ്പെട്ടവര്‍ക്ക് കിണര്‍ കുത്തി നല്‍കുന്ന പദ്ധതി കഴിഞ്ഞ മാസം ഉദ്ഘാടനം ചെയ്തിരുന്നു. തൊഴിലുറപ്പ് തൊഴിലാളികളെ ഉപയോഗിച്ച് പ്രാവര്‍ത്തികമാക്കേണ്ട ഈ പദ്ധതിയും നിശ്ചലമായി. 

മഴക്കാലപൂര്‍വ്വ രോഗങ്ങള്‍ക്കെതിരെയുള്ള ശുചീകരണപ്രവര്‍ത്തനങ്ങളില്‍ തൊഴിലുറപ്പ് തൊഴിലാളികളെയും പങ്കാളികളാക്കാം എന്ന നിര്‍ദ്ദേശം വന്നതിനു പിന്നാലെയാണ് കുടിശിഖ തീര്‍ക്കാതെ തങ്ങള്‍ പണിക്കിറങ്ങില്ലെന്ന് ഇവര്‍ പ്രഖ്യാപിച്ചത്. എന്നാല്‍ കൗണ്‍സിലില്‍ തീരുമാനിച്ച പ്രകാരം വേതനകുടിശിഖ ഘട്ടം ഘട്ടമായി തനത് ഫണ്ടില്‍ നിന്നും കൊടുത്തു തീര്‍ക്കുമെന്നും അതിനു ശേഷമേ തൊഴിലുറപ്പ് തൊഴിലാളികളെ കൊണ്ട് ഇനി പണിയെടുപ്പിക്കുകയുള്ളുവെന്നും ചെയര്‍മാന്‍ ചാക്കോ ജോസഫ് പറഞ്ഞു.



Share this News Now:
  • Google+
Like(s): 258