Breaking News
പാലായില്‍ പിക്ക് അപ് കാര്‍ കടയിലേക്ക് പാ‍ഞ്ഞുകയറി മൂന്ന് പേര്‍ക്ക് പരിക്ക്... ഏറ്റുമാനൂര്‍ -പാലാ റോഡില്‍ കാറും സ്കൂട്ടറും കൂട്ടിയിടിച്ച് സ്കൂട്ടര്‍ യാത്രക്കാരിക്ക് പരിക്ക്.... ഫുജൈറയിൽ വീടിന് തീപിടിച്ച് ഏഴ് കുട്ടികൾ ശ്വാസം മുട്ടി മരിച്ചു... സ്വകാര്യ ആശുപത്രിയിലെ നഴ്സുമാര്‍ വീണ്ടും സമരമുഖത്തേക്ക്... വീടിനു തീപിടിച്ച് പത്താം ക്ലാസ് വിദ്യാർഥിനി മരിച്ചു... ദില്ലിയിൽ മൂടൽമഞ്ഞും അതിശൈത്യവും തുടരുന്നു... മലയാളത്തിന്‍റെ പ്രിയതാരം ഭാവന വിവാഹിതയായി... തമിഴ്നാട്ടിലെ മധുരയിലുണ്ടായ വാഹനാപകടത്തിൽ രണ്ട് മലയാളികൾ മരിച്ചു.... ഗവര്‍ണറുടെ നയപ്രഖ്യാപന പ്രസംഗത്തോടെ നിയമസഭാ സമ്മേളനത്തിന് തുടക്കമായി...

10 January, 2018 11:32:30 AM


ബല്‍റാമിനെതിരേ ചീമുട്ടയേറ്; കൂറ്റനാട് വന്‍സംഘര്‍ഷം



പാലക്കാട്: തൃത്താല എംഎല്‍എ വിടി ബല്‍റാമിനെതിരേയുണ്ടായ പ്രതിഷേധത്തെ തുടര്‍ന്ന് കൂറ്റനാട് വന്‍സംഘര്‍ഷം. എകെജിയെക്കുറിച്ചുള്ള ബല്‍റാമിന്‍റെ വിവാദ ഫേയ്സ്ബുക്ക് പോസ്റ്റിനെതിരെയുള്ള പ്രതിഷേധമാണ് സംഘര്‍ഷത്തില്‍ കലാശിച്ചത്.പൊതുപരിപാടിക്ക് എത്തിയ ബല്‍റാമിന് നേര്‍ക്ക് സിപിഐഎം പ്രവര്‍ത്തകര്‍ ചീമുട്ടയെറിഞ്ഞതാണ് സംഘര്‍ഷത്തിന് തുടക്കമിട്ടത്. എംഎല്‍എക്കെതിരേ പ്രതിഷേധമുണ്ടാകുമെന്ന കണക്കുകൂട്ടലില്‍ വന്‍പൊലീസ് സംഘവും സ്ഥലത്തുണ്ടായിരുന്നു. ചീമുട്ടയേറിനെ തുടര്‍ന്ന് കോണ്‍ഗ്രസ് പ്രവര്‍ത്തകര്‍ പ്രതിഷേധിച്ചു. സപിഐഎമ്മുകാരെ നേരിടാന്‍ കോണ്‍ഗ്രസുകാരും സംഘടിച്ചു.


ബല്‍റാമിന്‍റെ വിവാദപരാമര്‍ശമുണ്ടായശേഷം തൃത്താലയിലെ ബല്‍റാമിന്‍റെ ആദ്യപൊതുപരിപാടിയായിരുന്നു കൂറ്റനാട്ട് നടന്നത്. കൂറ്റനാട് ബല്‍റാം പങ്കെടുക്കേണ്ട പൊതുപരിപാടി തുടങ്ങുംമുന്‍പ് തന്നെ സിപിഐഎമ്മുകാര്‍ പ്രതിഷേധവുമായി എത്തിയിരുന്നു. ഇവരെ പ്രതിരോധിക്കാന്‍ കോണ്‍ഗ്രസുകാരും സ്ഥലത്തുണ്ടായിരുന്നു. സമ്മേളനവേദിയിലേക്ക് ബല്‍റാമിന്‍റെ കാര്‍ എത്തുമ്പോഴേക്ക് സിപിഐഎമ്മുകാര്‍ കാറിന് നേര്‍ക്ക് പ്രതിഷേധമുയര്‍ത്തി എത്തുകയും ചീമുട്ടയെറിയുകയും ചെയ്തു. എംഎല്‍എയെ പ്രതിരോധിക്കാന്‍ കോണ്‍ഗ്രസ് പ്രവര്‍ത്തകര്‍ ശ്രമിച്ചതോടെയാണ് സംഘര്‍ഷം തുടങ്ങിയത്.


ഇതിനിടെ കല്ലേറുണ്ടാകുകയായിരുന്നു. പ്രതിഷേധക്കാരെ പിരിച്ചുവിടാന്‍ പൊലീസ് ലാത്തിവീശി. സംഘര്‍ഷത്തില്‍ പട്ടാമ്പി എസ്‌ഐ സൂരജ് അടക്കം ഏതാനും പൊലീസുകാര്‍ക്കും പരുക്കേറ്റിട്ടുണ്ട്. പ്രതിഷേധം നടന്നെങ്കിലും പരിപാടിയില്‍ ബല്‍റാം പങ്കെടുത്തു. ബല്‍റാമിന് നേര്‍ക്ക് കൈയേറ്റശ്രമമുണ്ടായി. ഇതിനിടെ പ്രതിഷേധക്കാരും പൊലീസും തമ്മില്‍ ഏറ്റുമുട്ടല്‍ നടന്നു. സംഘര്‍ഷത്തെ തുടര്‍ന്ന് പൊലീസ് സംഘം എംഎല്‍എയെ പരിപാടി പെട്ടെന്ന് പൂര്‍ത്തിയാക്കി മടക്കിയയച്ചു.


എകെജിയും സുശീല ഗോപാലനും തമ്മിലുള്ള ബന്ധത്തെക്കുറിച്ച്‌ ഫെയ്സ്ബുക്കില്‍ വിടി ബല്‍റാം ഇട്ട പോസ്റ്റിനെ തുടര്‍ന്നാണ് ബല്‍റാമിനെതിരേ പ്രതിഷേധമുണ്ടായത്. ഇതിനിടെ, പ്രതിഷേധമുണ്ടാകാനുള്ള സാധ്യത പരിഗണിച്ച്‌ കുറച്ചുദിവസത്തേക്ക് പൊതുപരിപാടി ഒഴിവാക്കണമെന്ന് ബല്‍റാമിനോട് പൊലീസ് നിര്‍ദേശിച്ചിരുന്നു.



Share this News Now:
  • Google+
Like(s): 72