25 December, 2017 03:09:46 PM


ആർഎസ്എസ് കാര്യാലയം കത്തിക്കാൻ ശ്രമം: ഏറ്റുമാനൂരിൽ ചൊവ്വാഴ്ച ഹർത്താൽ



കോട്ടയം: ഏറ്റുമാനൂരിലെ ആർ.എസ്.എസ് കാര്യാലയത്തിന് നേരെ നടന്ന ആക്രമണത്തിൽ പ്രതിഷേധിച്ച് സംഘപരിവാർ ചൊവ്വാഴ്ച ഹർത്താലിന് ആഹ്വാനം ചെയ്തു. ഏറ്റുമാനൂർ നഗരസഭാ അതിർത്തിയിൽ രാവിലെ 6 മുതൽ വൈകിട്ട് 6 വരെയാണ് ഹർത്താൽ. ശബരിമല സീസൺ പ്രമാണിച്ച് ഏറ്റുമാനൂർ ക്ഷേത്ര മൈതാനത്തെ കടകളെയും മെഡിക്കൽ ഷോപ്പുകളെയും ആശുപത്രികളെയും ഹർത്താലിൽ നിന്ന് ഒഴിവാക്കിയിട്ടുണ്ട്. ദീർഘദൂര വാഹനങ്ങളെയും ഹർത്താൽ ബാധിക്കില്ല.


എസ് എഫ് ഐ - എ ബി വി പി പ്രവർത്തകർ തമ്മിലുണ്ടായ സംഘട്ടനത്തെ തുടർന്ന് കഴിഞ്ഞ ദിവസം ആർ എസ് എസ് കാര്യാലയത്തിന് നേരെ അക്രമം ഉണ്ടായിരുന്നു. ഇതിന് പിന്നാലെയാണ് ഞായറാഴ്ച രാത്രി 11 മണിയോടെ ഒരു സംഘം ആളുകൾ ഓഫീസ് അഗ്നിക്കിരയാക്കാൻ ശ്രമിച്ചത്. സി പി എം കാരാണ് അക്രമത്തിന് പിന്നിലെന്ന് ആർ എസ് എസ് ഭാരവാഹികൾ ആരോപിച്ചു.



ഏറ്റുമാനൂർ ഐ ടി ഐ യിലെ എസ് എഫ് ഐ വിദ്യാർത്ഥികളും ഏറ്റുമാനൂരപ്പൻ കോളേജിലെ എ ബി വി പി വിദ്യാർത്ഥികളും തമ്മിലുണ്ടായ വാക്കേറ്റം സംഘട്ടനത്തിൽ കലാശിച്ചു. ഒരാൾക്ക് പരിക്കേറ്റു. എസ്എഫഐ പ്രവർത്തകർ ഏറ്റുമാനൂർ മഹാദേവക്ഷേത്രത്തിന് സമീപമുള്ള ആർ എസ് എസ് കാര്യാലയം ആക്രമിച്ച് അടിച്ചു തകർത്തു. കാര്യാലയത്തിന് മുന്നിൽ നിർത്തിയിരുന്ന ആറോളം ബൈക്കുകളും  തല്ലി തകർത്തു.


കഴിഞ്ഞ വെള്ളിയാഴ്ച ഉച്ചയോടെ ഐടിഐയില്‍ നിന്നെത്തിയ എസ്എഫ്ഐ പ്രവര്‍ത്തകരും ഏറ്റുമാനൂരപ്പന്‍ കോളേജിലെ എബിവിപി പ്രവര്‍ത്തകരും തമ്മിലുണ്ടായ സംഘർഷത്തിന്‍റെ ബാക്കിയായാണ് ഏറ്റുമാനൂരില്‍ അക്രമസംഭവങ്ങള്‍ അരങ്ങേറുന്നത്. ക്രിസ്തുമസ് ആഘോഷങ്ങള്‍ക്കിടെ  ഐ ടി ഐ യിൽ നിന്നും എത്തിയ  ഒരു സംഘം വിദ്യാർത്ഥികൾ ഏറ്റുമാനുരപ്പൻ കോളേജിലെ വിദ്യാർത്ഥികളുമായി ഏറ്റുമട്ടുകയായിരുന്നു. അന്ന് ആക്രമണത്തിൽ എബിവിപി പ്രവർത്തകനായ അഖിൽ രാജിന് പരിക്കേറ്റിരുന്നു. കോളേജിലെ സംഘട്ടനത്തെ തുടര്‍ന്ന് പാലാ റോഡിൽ മംഗലം കലുങ്കിനടുത്ത് വെച്ചും ഇരു പാർട്ടികളും ഏറ്റുമുട്ടിയിരുന്നു.


അതിനു ശേഷം വൈകിട്ട് മുപ്പതോളം വരുന്ന എസ് എഫ് ഐ പ്രവർത്തകർ ബൈക്കിലെത്തി ആർ എസ് എസ് കാര്യാലയത്തിനു നേരെ ആക്രമണം നടത്തകയായിരുന്നുവത്രേ. ഓഫീസിലെ  വാതിലുകളും ജനൽ ചില്ലുകളും ഫോട്ടോകളും ആക്രമണത്തിൽ തകർന്നു. ഇതിനു പിന്നാലെയാണ് ഞായറാഴ്ച രാത്രിയിലെ സംഭവം. ഏറ്റുമാനൂര്‍ പോലീസ് സ്ഥലത്തെത്തി അന്വേഷണം ആരംഭിച്ചു





Share this News Now:
  • Google+
Like(s): 1884