23 December, 2017 01:43:27 AM


നിര്‍ദ്ദനകുടുംബങ്ങളില്‍ ക്രിസ്തുമസ് കേക്ക് എത്തിച്ച് ഏറ്റുമാനൂര്‍ നഗരസഭാ കൗണ്‍സിലര്‍



ഏറ്റുമാനൂര്‍: ജനപ്രതിനിധികളുടെ ഇടയില്‍ വ്യത്യസ്തനാവുകയാണ് ഏറ്റുമാനൂര്‍ നഗരസഭാ കൗണ്‍സിലര്‍ ചാക്കോ ജോസഫ് എന്ന ജോയി മന്നാമല. രണ്ട് വര്‍ഷം മുമ്പ് സ്വതന്ത്രസ്ഥാനാര്‍ത്ഥിയായി  29-ാം വാര്‍ഡായ പാറോലിക്കലില്‍ മത്സരിച്ച ജോയി മന്നാമലയെ നഗരസഭയിലേക്ക് ജയിപ്പിച്ചു വിടുമ്പോള്‍ സാധാരണയില്‍ കവിഞ്ഞൊന്നും വോട്ടര്‍മാര്‍ പ്രതീക്ഷിച്ചിരുന്നില്ല. എന്നാല്‍ തന്നെ ജയിപ്പിച്ചു വിട്ട ജനങ്ങളെ അങ്ങനെ കയ്യൊഴിയാന്‍ ജോയി തയ്യാറായില്ല. 


എല്ലാവരെയും ഞെട്ടിച്ചുകൊണ്ടു തന്നെയാണ് ജയിച്ച വര്‍ഷം ജോയി ക്രിസ്തുമസിനെ വരവേറ്റത്. സന്തോഷത്തിന്‍റെയും സമാധാനത്തിന്‍റെയും സന്ദേശം എത്തിച്ചുകൊണ്ട് തന്‍റെ വാര്‍ഡിലെ പ്രജകളുടെ എല്ലാവരുടെയും വീടുകളില്‍ ജോയി എത്തി. വെറുതെയല്ല ചെന്നത്. സഹവര്‍ത്തിത്വത്തിന്‍റെ സന്തോഷം പകരാന്‍ കൊതിയൂറുന്ന കേക്കുമായാണ് ജോയി തന്‍റെ വാര്‍ഡിലെ നാനൂറ് വീടുകളിലും കയറിയിറങ്ങിയത്.


ഈ ക്രിസ്തുമസും പുതുവത്സരവും ജോയിയെ സംബന്ധിച്ച് മറ്റൊരു പ്രത്യേകത കൂടിയുണ്ട്. ഏറ്റുമാനൂര്‍ നഗരസഭയില്‍ ചെയര്‍മാന്‍ രാജി വെച്ച ഒഴിവില്‍ ജോയിയുടെ പേരാണ് യുഡിഎഫ് അംഗങ്ങളും കൂടെ സ്വതന്ത്രരായി ജയിച്ച അംഗങ്ങളും നിര്‍ദ്ദേശിച്ചിരിക്കുന്നത്. ചെയര്‍മാന്‍ സ്ഥാനത്തേക്ക് അടുത്ത് നടക്കുന്ന തെരഞ്ഞെടുപ്പില്‍ തിരിമറികളൊന്നും ഉണ്ടായില്ലെങ്കില്‍ ജോയി മന്നാമല തന്നെയായിരിക്കും അടുത്ത ഒരു വര്‍ഷം ഏറ്റുമാനൂര്‍ നഗരസഭയെ നയിക്കുക.


ഇതിനിടെയാണ് ജോയി തന്‍റെ പുതിയ തീരുമാനം അറിയിച്ചിരിക്കുന്നത്. ഇക്കുറി ക്രിസ്തുമസ് ആഘോഷം നഗരസഭാ പരിധിയിലെ നിര്‍ദ്ദനരായ കുടുംബങ്ങളോടൊപ്പം പങ്കുവെയ്ക്കണം. നഗരസഭയിലെ 35 വാര്‍ഡുകളില്‍ നിന്നും പത്ത് കുടുംബങ്ങളെ വീതം തെരഞ്ഞെടുത്ത് 350 പേര്‍ക്ക് കേക്ക് വിതരണം ചെയ്യാനാണ് ജോയി തീരുമാനിച്ചത്. ജോയിയുടെ തീരുമാനം അറിഞ്ഞപ്പോള്‍ നവജീവന്‍ ട്രസ്റ്റിലെ പി.യു.തോമസും ഇതോടൊപ്പം സഹകരിക്കണമെന്ന് ആഗ്രഹം. അങ്ങനെ ശനിയാഴ്ച ഉച്ചകഴിഞ്ഞ് നഗരസഭാ ഹാളില്‍ എല്ലാവരെയും വിളിച്ച് ചേര്‍ത്ത് ആശംസകള്‍ അറിയിക്കാനും കേക്ക് വിതരണം ചെയ്യാനും തീരുമാനമായി. 


സര്‍ക്കാരിന്‍റെ ആശ്രയ പദ്ധതി പ്രകാരം ഓരോ വാര്‍ഡിലും കണ്ടെത്തിയ തീര്‍ത്തും നിര്‍ദ്ദനരായ കുടുംബങ്ങളെയാണ് ജോയി ഇപ്രാവശ്യം ക്രിസ്തുമസിന് കേക്ക് നല്‍കാന്‍ ക്ഷണിച്ചിരിക്കുന്നത്. എന്നാല്‍ തന്‍റെ ജീവകാരുണ്യപ്രവര്‍ത്തനങ്ങള്‍ക്ക് പബ്ലിസിറ്റി നല്‍കാനൊന്നും ജോയി തയ്യാറല്ല. ഇതേ പറ്റി ചോദിച്ചപ്പോള്‍ പബ്ലിസിറ്റിയിലല്ല, പ്രവൃത്തിയിലാണ് കാര്യം എന്നായിരുന്നു ജോയിയുടെ മറുപടി. ഓഖി ചുഴലിക്കാറ്റിനെ തുടര്‍ന്ന് തിരുവനന്തപുരം പ്രദേശത്ത് ദുരന്തമനുഭവിക്കുന്നവര്‍ക്ക് കെസിസി യൂണിറ്റിന്‍റെ നേതൃത്വത്തില്‍ അരി എത്തിച്ചതിന് പിന്നിലും ജോയിയുടെ കരങ്ങള്‍ ഉണ്ടായിരുന്നു. 



Share this News Now:
  • Google+
Like(s): 235