27 October, 2017 08:52:13 AM


പ്രവാസി ക്ഷേമ ബോര്‍ഡ് കാര്യക്ഷമമാക്കും: ജോര്‍ജ് വര്‍ഗീസ്

ദമാം: കേരള പ്രവാസി ബോര്‍ഡ് കൂടുതല്‍ കാര്യക്ഷമമാക്കുമെന്നും ഇതിനായി കറിയാത്മകമായ ഇടപെടല്‍ നടത്തുമെന്നും ഡയറക്റ്റര്‍ ബോര്‍ഡ് അംഗമായി നിയമിതനായ ജോര്‍ജ് വര്‍ഗീസ് പറഞ്ഞു. കഴിഞ്ഞ അഞ്ചു വര്‍ഷത്തെ അനാസ്ഥ മൂലം ഭൂരിപക്ഷം പ്രവാസികളും ക്ഷേമ ബോര്‍ഡ് ആനുകൂല്യങ്ങള്‍ അറിഞ്ഞിരുന്നില്ല. എന്നാല്‍ അത് പരിഹരിക്കാന്‍ പ്രവാസി സംഘടനകളുടെ സഹകരണത്തോടെ പ്രചാരണ ക്യാംപയിന്‍ സംഘടിപ്പിക്കുമെന്നും ദമാമില്‍ വാര്‍ത്താ സമ്മേളനത്തില്‍ അദ്ദേഹം പറഞ്ഞു.

പ്രവാസി പെന്‍ഷന്‍ ഇപ്പോള്‍ 1000 രൂപയില്‍ നിന്നും 2000 രൂപയാക്കി ഉയര്‍ത്തിയിട്ടുണ്ട്. വിവിധ കാരണങ്ങളാല്‍ പണം അടക്കാന്‍ കഴിയാത്തവര്‍ക്കും വീഴ്ച്ച വരുത്തിയവര്‍ക്കും പിഴയും പലിശയും ഒഴിവാക്കി കുടിശിക നിവാരണത്തിന് സെപ്റ്റംബര്‍ മുതല്‍ അടുത്ത വര്‍ഷം ഫെബ്രുവരി വരെയുള്ള ആറുമാസക്കാലാവധി നല്‍കുന്നുണ്ട്. മരണാനന്തര സഹായം ഏകീകരിക്കുകയും അമ്പത്തിനായിരത്തില്‍ നിന്നും ഒരു ലക്ഷമായി ഉയര്‍ത്തുകയും ചെയ്തു. രജിസ്‌ട്രേഷന്‍ അടക്കം വിവിധ കാര്യങ്ങള്‍ ഓണ്‍ലൈന്‍ വഴിയാക്കിയിട്ടുണ്ട്. ഇത് ലോകത്തിന്റെ ഏതു കോണില്‍ നിന്നുമുള്ള പ്രവാസികള്‍ക്കും സഹായകരമാകും അദ്ദേഹം പറഞ്ഞു. കഴിഞ്ഞ ബജറ്റില്‍ പ്രവാസികള്‍ക്കായി ആറു കോടി രൂപ ബജറ്റില്‍ ഉള്‍ക്കൊള്ളിച്ചിട്ടുണ്ടെന്നും അദ്ദേഹം പറഞ്ഞു.



Share this News Now:
  • Google+
Like(s): 22