26 July, 2017 02:24:50 PM
സ്വാതന്ത്ര്യസമര സേനാനിയും ഗാന്ധിയനുമായ കെ.ഇ. മാമ്മൻ അന്തരിച്ചു
തിരുവനന്തപുരം (26/7/17): സ്വാതന്ത്ര്യ സമര സേനാനിയും മദ്യവിരുദ്ധ പ്രവർത്തകനും തികഞ്ഞ ഗാന്ധിയനുമായ കെ.ഇ. മാമ്മൻ (96) അന്തരിച്ചു. നെയ്യാറ്റിൻകരയിലെ സ്വകാര്യ ആശുപത്രിയിലായിരുന്നു അന്ത്യം. വാർധക്യസഹജമായ അസുഖം മൂലം ചികിത്സയിലായിരുന്നു. ഇന്ന് രാവിലെ അസുഖം മൂർഛിച്ചതിനെത്തുടർന്ന് വെന്റിലേറ്ററിലേക്ക് മാറ്റിയെങ്കിലും രാവിലെ പതിനൊന്നോടെ അന്ത്യം സംഭവിക്കുകയായിരുന്നു.
ക്വിറ്റ് ഇന്ത്യാ സമരത്തിലും സർ സിപിക്കെതിരായ സമരപോരാട്ടങ്ങളിലും സജീവമായി പങ്കെടുത്ത വ്യക്തിയാണ് മാമൻ. പ്രശസ്തമായ കണ്ടത്തിൽ കുടുംബത്തിൽ കെ.സി. ഈപ്പന്റെയും കുഞ്ഞാണ്ടമ്മയുടെയും ഏഴു മക്കളിൽ ആറാമനായി 1921 ജൂലൈ 31നാണ് കണ്ടത്തിൽ ഈപ്പൻ മാമ്മൻ എന്ന കെ.ഇ. മാമ്മൻ ജനിച്ചത്. തിരുവനന്തപുരത്തായിരുന്നു ജനനം. 1940ൽ മദ്രാസ് ക്രിസ്ത്യൻ കോളജിൽ ബിരുദത്തിനു ചേർന്നെങ്കിലും 1942ലെ ക്വിറ്റ് ഇന്ത്യാ സമരത്തിൽ പങ്കെടുത്തതോടെ അവിടെനിന്നും പുറത്താക്കപ്പെട്ടു.
ഇരുപത്തിരണ്ടാം വയസു മുതൽ തിരുവല്ലയും കോട്ടയവുമായിരുന്നു പ്രവർത്തന കേന്ദ്രം. 1996ലാണ് വീണ്ടും തിരുവനന്തപുരത്തേക്ക് താമസം മാറ്റിയത്. രാമാശ്രമം അവാർഡ്, ലോഹ്യാവിചാര വേദിയുടെ അവാർഡ്, ടികെവി ഫൗണ്ടേഷൻ അവാർഡ് തുടങ്ങിയവ ലഭിച്ചു. 1995ൽ കോട്ടയം വൈഎംസിഎ മദർ തെരേസ പുരസ്കാരം നൽകി ബഹുമാനിച്ചു. അവിവാഹിതനാണ്.